• Présentation
• Recherche session
• Recherche trans-session
• Auteurs
• Références

aide

Discours/Cérémonie

Lettre de commission ou assimilée - E16820820(5)

Nature	Lettre de commission ou assimilée
Code du discours/geste	E16820820(5)
CODE de la session	16821022
Date	20/08/1682
Cote de la source	C 7214
Folio	75r-75v
Espace occupé	0,8

Texte :

Commission a M[r] d'Aguesseau pour assister aux estats
Louis par la grace de Dieu Roy de France et de Navarre a nostre amé et feal le sieur d'Aguesseau conseiller en nos conseilz, maistre des requestes ordinaire de nostre hostel et intendant de justice, police et finances en nostre province de Languedoc, salut. Nous avons fait expedier nos lettres de commission ordinaires a nostre très cher et très amé cousin le duc de Noailles, pair de France, capitaine de la premiere compagnie des gardes de nostre corpz soubz le tiltre des Escossois, gouverneur et nostre lieutenant general ez comtez et viguerie de Roussillon, Conflan et Serdagne et commandant en chef pour nostre service en nostre dite province de Languedoc et aux autres commissaires desnommez par lesdites commissions pour assister de nostre part en la prochaine assemblée des estats de nostre dit pays, et d'autant que vous estes bien informé de l'estat de nos affaires en ladite province, nous avons aussy resolu de vous faire trouver en ladite assemblée. A cette cause nous vous avons commis et deputé, commettons et deputons par ces presentes signées de nostre main, pour vous rendre et assister de nostre part en ladite prochaine assemblée des trois estats de nostre dit pays de Languedoc et, avec lesdits autres commissaires par nous deputez en icelle, y proposer ce que vous jugerez y estre necessaire pour l'execution de nosdites commissions afin que sans retardement quelconque il soit procedé au despartement, levée et imposition des sommes contenues en icelles suivant l'ordre par nous prescrit et ordonné, au reste voir et entendre les deliberations qui se feront en ladite assemblée concernant nostre dit service, le bien, le repos et soulagement de nos sujets dudit pays tout ainsy et en la mesme forme et maniere que si vous aviez esté compris et nommé par nosdites commissions pour la tenue desdits estats. De ce faire, vous avons donné et donnons pouvoir et commission, mandons a nostre dit cousin de tenir la main a l'effet et execution de ces dites presentes, car tel est nostre plaisir. Donné a Versailles le 20e jour d'aoust l'an de grace mil six cent quatre vingt deux et de nostre regne le quarent(iesm)e, signé Louis et plus bas Phelypeaux.