aide
Discours/Cérémonie
Messe "pontificale" et procession - R16610130(01)
| Nature |
Messe "pontificale" et procession |
| Code du discours/geste |
R16610130(01) |
| CODE de la session |
16610124 |
| Date |
30/01/1661 |
| Cote de la source |
C 7128 |
| Folio |
27v-29r |
| Espace occupé |
2,5 |
Locuteur
| Titre |
np |
| Nom |
np |
| Prénom |
np |
| Fonction |
np |
Texte :
Le dimanche trentiesme dud. mois de janvier, jour destinné pour la procession generalle, Messieurs des estatz se seroient tous rendus au lieu de l'assemblée, et apprès avoir fait distribuer un cierge a un chacun, ilz seroient allés en corps dans la grande esglise collegialle ou Son A. S(erenissi)me et Messieurs les au(tr)es commissaires du Roy se seroient aussy rendus, estans partis ensemble de l'hostel de S. A., laquelle auroit pris sa place a la droicte du cœur et immediatement apprès Messieurs les autres commissaires, aux chaises basses au dessoubz de celle de S. A. estoient placés son capitaine des gardes et le secretaire et greffier du Roy suivant l'usage ordinaire, et l'ordre de la noblesse estoit rangé dans les chaises du mesme costé de Messieurs les commissaires du Roy, et de l'autre costé a la main gauche en entrant dans le cœur estoient Messieurs les prelatz et grandz vicaires, et dans le parterre du cœur les deputés du tiers estat placés en bon ordre estoient assis sur des formes, Monsieur l'archevesque et primat de Narbonne ayant celebré pontificalement la saincte messe et Monsieur l'evesque de Montauban faict une belle predica(ti)on, après laquelle toutes choses auroient esté disposées pour l'ordre de la procession comme s'ensuit.
Le lieutenant et enseigne des gardes de Son Altesse S(erenissi)me marchoient a la teste de la compagnie avec les trompettes, et a la queüe estoient les deux exempts des gardes, les deux maisons religieuzes qui sont dans la ville assistoient a lad. procession, et immediatement après estoit la musique de la chapelle des estatz et Messieurs du chappitre ensuitte revestus de leurs chappes en fort bel ordre, le dais estoit porté par les quatre consuls de la ville revestus de leurs robbes de livrée, Monsieur l'archevesque de Narbonne faisoit l'office et portoit le sainct sacrement environné d'un grand nombre de prestres revestus de beaux ornemens, après le daix quatre pages de S. A. S. portoient de grandz flambeaux de cire blanche, et immediatement après le secretaire des commandemens de Son A. avec le secretaire et greffier du Roy selon l'ordre accoustumé marchoient devant Sad. Altesse, ayant son capitaine des gardes proche d'elle, et trois ou quatre pas près marchoient Messieurs les au(tr)es commissaires du Roy, après marchoit l'ordre de l'esglise, ayant au devant un scindic general et un secretaire des estatz, après l'ordre de la noblesse ayant aussy deux officiers a la teste, Messieurs dud. ordre peu auparavant qu'on prinst les rangz pour lad. procession ayant par la bouche de Monsieur le baron de Gange faict les protestations a S. A. S(erenissi)me et a Messieurs les au(tr)es commissaires comme ils n'entendoient se prejudicier en donnant le pas a Messieurs les prelatz et requis que le reg(ist)re du greffe de Sa Majesté demeurast chargé de leursd. protestations, ce qui leur auroit esté accordé par S. A., et les ordres continuant a deffiler un autre scindic general et un greffier marchoient au devant du tiers estat, on observoit une certaine distance dans la marche de la procession pour faire le discernement des trois ordres qui composent lesd. estatz, tous ceux qui assistoient a lad. procession avoient chacun un cierge allumé, les rues estoient tapissées, et ceste procession se fist avec grande reverence et beaucoup de devotion, au retour de laquelle chacun ayant repris sa place dans l'eglise, Monsieur l'archevesque de Narbonne donna la benediction avec le s(ain)t sacrement, après laquelle on se retira.
