aide
Discours/Cérémonie
Visite ou réception protocolaire - E16591016(02)
Nature |
Visite ou réception protocolaire |
Code du discours/geste |
E16591016(02) |
CODE de la session |
16591001 |
Date |
16/10/1659 |
Cote de la source |
C 7125 |
Folio |
016r et 017r |
Espace occupé |
0,75 |
Locuteur
Titre |
np |
Nom |
np |
Prénom |
np |
Fonction |
np |
Texte :
Monseigneur l'archevesque de Narbonne, presid(en)t, a dict que Monsieur de S(ain)t Tost, m(aistr)e des ceremonies, avoit esté chés luy pour l'advertir que le Roy avoit resoleu de donner aujourdhuy audiance aux estatz sur les dix a unze heures de matin, auquel temps les Estatz sont partis en corps, ordre par ordre, divisés par un des scindicz generaux, le reste des officiers estant a la teste du corps, et sont allés a l'archevesché ou le Roy loge, ayant treuvé a la premiere porte les archers de la garde du Roy soubz les armes et un exempt de ses gardes quy les a conduictz dans la chapelle dud. archevesché, attendant que le Roy feust en estat de les recevoir, ou ayant demuré environ un demy quart d'heure ils auroint esté appellés et conduictz par Monsieur de S(ain)t Tost, une enseigne des gardes du corps et un exempt jusques au haut du degré et auroint treuvé a la porte de la premiere salle ou les gardes du Roy estoint soubz les armes en haye Monsieur de La Vrilliere, secretaire d'estat, quy [s]e seroit mis a leur teste et les auroict conduictz a la salle de l'audiance ou le Roy les attendoit, accompai[g]né des princes et grandz seigneurs de la cour, et les trois ordres estant entrés et le tiers estat et officiers de la province s'estant mis a genoux, Monseigneur l'archevesque de Narbonne a harangué Sa Majesté et l'a asseurée des fidelités des peuples de cette province par un très eloquent discours dont la teneur est comme s'ensuict [voir E16591016(03)].
Après quoy les Estatz estant sortis, ordre par ordre, de la chambre du Roy, ils ont esté reconduictz jusques au bout du degré par Monsieur de La Vrilliere et de la ont esté ramenés dans la chapelle de l'archevesché par Monsieur de S(ain)t Tost, un enseigne et exempt des gardes du corps de Sa Majesté, duquel lieu les Estatz se sont separés.
[Dans le registre du roi, C 7124, f. 21v, on trouve la mention suivante à la suite du récit de l'audience royale : "Estant a remarquer que sur la pretention que le parlement de Toulouze avoit de porter le premier la parolle au Roy, Sa Majesté en ayant eu cognoissnce auroit accordé cest honneur aux estatz qui auroient harangué les premiers Leurs Majestés.]